MOURINHO AANZA KAZI STRAIKA ANDRE SCHURRLE DARAJANI:,

CAVANI MAZUNGUMZONI NA REAL & CITY!

CHELSEA, chini ya Meneja mpya Jose Mourinho, inakaribia kumsaini Mchezaji wao wa kwanza Fowadi wa Bayer Leverkusen Andre Schurrle na kule Aston Villa Wachezaji wa Denmark Jores Okore na Beki wa Holland Leandro Bacuna wamekamilisha Uhamisho wao huku Straika hatari wa Napoli anaetokea Uruguay, Edinson Cavani, ameripotiwa kuwa na mazungumzo na Real Madrid na Manchester City.

Andre Schurrle: kusaini Chelsea kwa Pauni Milioni 18

Andre Schurrle anatarajiwa kuwa Mchezaji wa kwanza kusainiwa na Meneja mpya Jose Mourinho Klabuni Chelsea.

Chelsea imefikia makubaliano na Bayer Leverkusen ya Germany kwa Mchezaji huyo kuhama kwa Dau la Pauni Milioni 18.

Schurrle, Miaka 22, anatarajiwa kujadiliana na Chelsea maslahi yake binafsi na kisha kupimwa afya yake.

Andre Schurrle:

-UMRI: 22

-UREFU: Futi 6

-NAFASI: Straika/Winga

-KLABU: Mainz, Leverkusen

-MAGOLI TIMU YA TAIFA GERMANY: 7 Mechi 24

Uhamisho wa Andre Schurrle umethibitishwa na Tovuti ya Chelsea.

Ingawa huyu ndie anakuwa Mchezaji wa kwanza kusainiwa na Chelsea chini ya Mourinho lakini inaaminika Uhamisho huu ulianza tangu hata Mreno huyo hajatangazwa Meneja mpya hapo Juni 3.

Katika Msimu wa Bundesliga wa 2012/13, Andre Schurrle alifunga Bao 11 katika Mechi 34 za Ligi.

Villa yawasaini Okore na Bacuna

Aston Villa imekamilisha Uhamisho wa Beki wa Denmark Jores Okore na Kiungo wa Holland Leandro Bacuna.

Okore anatokea Klabu ya FC Nordsjaelland ambayo imemaliza Nafasi ya Pili katika Ligi Kuu ya Denmark, Superliga, na amesaini Mkataba wa Miaka minne na Villa.

Nae Bacuna, Miaka 21, anatokea Klabu ya Holland FC Groningen ambako amechezea Mechi zaidi ya 100 tangu 2009 na kufunga Bao 5 Msimu uliopita.

Cavani

Kwa mujibu wa Mama mzazi wa Staa wa Napoli, Edinson Cavani, Mchezaji huyo sasa ana mazungumzo na Real Madrid na Manchester City ili kuhama huko Italy.

Cavani, ambae ni Nyota wa Kimataifa wa Uruguay, inadaiwa pia anasakwa na Chelsea.

Ili kumchukua Mchezaji huyo huku bado akiwa na Mkataba na Napoli, Klabu inayomtaka inabidi itimize Kipengele cha Mkataba wake na kulipa Pauni Milioni 53.

Akithibitisha mazungumzo yaliyopo, Mama Mzazi wa Cavani, Berta Gomez, aliongea na Redio moja huko kwao Montevideo, Uruguay, na kusema: “Edi kwa sasa anaongea na Real na City. Baada ya Wiki 2 au 3, tutajua nini hatima yake!”

NA Thesuperonenews.blogspot.com