RAIS DORTMUND ATAMKA: “LEWANDOWSKI NG’O HAUZWI BAYERN!”

SASA MILANGO WAZI KUTUA ENGLAND?NI MAN UNITED, CITY AU CHELSEA??

WAKATI Wadau wakitegemea Straika hatari wa Borussia Dortmund, Robert Lewandowski, yuko njiani kutua kwa Mabingwa wa Ulaya na Germany, Bayern Munich, Rais wa Dortmund, Hans-Joachin Watzke, amegoma kabisa na kusisitiza haiwezekani wao kuwauzia Staa huyo Wapinzani wao.

Rais Hans-Joachin Watzke alitamka kwa msisitizo: “Lewandowski kamwe hataenda Bayern 2013! Huo ni mwisho!”

Kauli hiyo ina maana kubwa sana maana Lewandowski Mkataba wake na Borussia Dortmund unamalizika mwishoni mwa Msimu ujao wa 2013/14 na kama hauzwi sasa basi Mchezaji huyo atakuwa Mchezaji Huru na Dortmund haitapata hata Shilingi moja akiondoka wakati huo.

Lakini pia kauli hii ya Rais wa Borussia Dortmund, Hans-Joachin Watzke, imezua matumaini makubwa kuwa Dortmund wako tayari kumuuza sasa Staa huyo kwa Klabu za England na hasa Manchester United ambao kwa muda mrefu wamehusishwa na Straika huyo.

Hata hivyo, zipo taarifa zinazodai Manchester City na Chelsea vile vile zinamwinda Mchezaji huyo kutoka Poland

Hivi karbuni, Lewandowski, Miaka 25, amekuwa akidokeza kuwa tayari ameshafikia makubaliano na Klabu ‘mpya’ inayosadikiwa kuwa ni Bayern Munich.

Inaaminika ikiwa Lewandowski atauzwa basi Dortmund itaivaa Liverpool ili kumnunua Straika wao kutoka Uruguay Luis Suárez na vivyo hivyo ikiwa Man United itamchukua Lewandowski ni wazi Wayne Rooney atang’oka tu.