PHIL NEVILLE: ASTAAFU KUCHEZA SOKA FAHAMU ALIYOYAFANYA

ASEMA HAKUTANGAZA MAPEMA KWANI KILA MTU ALIKUWA AKISTAAFU!!

MCHEZAJI wa zamani wa Manchester United, Everton na Timu ya Taifa ya England Phil Neville ametangaza kustaafu kucheza Soka baada ya Miaka 18 ya kuwa Mchezaji.

Neville, Miaka 36, alitangaza Mwezi Aprili kwamba ataondoka Klabu yake Everton mwishoni mwa Msimu na sasa anatarajiwa kufanya kazi kama Kocha na kama Mchambuzi wa Soka kwenye Vyombo vya Habari.

Neville ametoboa kuwa atakuwa Mchambuzi wa BBC, Shirika la Habari la Uingereza, kwenye Fainali za Kombe la Dunia Mwaka 2014 huko Brazil.

Phil Neville-Mataji:

[Yote akiwa na Manchester United]

FA Youth Cup: 1995

Premier League: 1996, 1997, 1999, 2000, 2001, 2003

FA Cup: 1996, 1999, 2004

Community Shield: 1996, 1997, 2003

Champions League: 1999

Intercontinental Cup: 1999

Neville, aliechezea England mara 59, alianza kucheza BPL, Barclays Premier League, Mwaka 1995 akiwa na Manchester United katika Mechi dhidi ya Manchester City na kushinda Bao 3-0 na akadumu Misimu 19 kwenye BPL.

Akiwa na Man United alitwaa Ubingwa wa BPL mara 6, FA CUP mara 3 na Ubingwa wa Ulaya mara moja kabla kujiunga na Everton Mwaka 2005.

Akiwa Everton, Phil Neville, chini ya Meneja David Moyes ambae sasa amehamia Man United, aliteuliwa kuwa Nahodha wa Klabu hiyo.

Neville pia alisema kuwa alishindwa kutangaza kustaafu kwake Soka mapema kwa vile wakati huo huo Watu aliokuwa nao kwa muda mrefu, Meneja wa Man United, Sir Alex Ferguson, Wachezaji wenzake alioanza nao, David Beckham na Paul Scholes, wote walitangaza kustaafu na yeye hakutaka kuonekana kufuata mkumbo.

Alisema: “Wiki 3 zilizopita, kila Mtu Duniani alionekana kustaafu! Mimi sikutaka nionekane nafuata mkumbo!”

Hivi sasa Phil Neville yupo mbioni kumalizia kutwaa Leseni ya UEFA ya Ukocha kiwango A na alithibitisha ni Sir Alex Ferguson ndio aliwataka wachukue Kozi za Ukocha na walipokuwa Man United yeye na Roy Keane, Gary Neville, Nicky Butt na Ryan Giggs, wote walichukua Mafunzo ya kiwango cha UEFA cha Leseni B ya Ukocha.

Neville aliongeza: “Tukiwa Man United, Sir Alex Ferguson alitupa fundisho kubwa na kusisitiza tuanze Mafunzo ya Ukocha mapema huku akituambia hamna njia ya mkato ya kuwa Meneja au Kocha!””

Hivi sasa zipo habari kuwa Phil Neville atakuwa mmoja wa Wasaidizi wa Meneja mpya wa Man United, David Moyes, kama mmoja wa Makocha kwenye Benchi lake la Ufundi.

Akiwa Man United, Phil Neville alicheza pamoja na Kaka yake Gary Neville ambae nae ameshastaafu na sasa anafanya kazi kama Mchambuzi wa Soka kwenye TV ya SkySports.

Akiwa Beki wa Manchester United, Gary Neville, Miaka 35, aliamua kutundika daluga zake Mwaka 2011 baada ya kuichezea Man United tangu Mwaka 1992 na kucheza mechi 602 na pia kuichezea Timu ya Taifa ya England mara 85.

Akitangaza kustaafu, Gary Neville alitamka: “Mimi ni shabiki wa Man United maisha yangu yote na nimetimiza kila ndoto yangu. Inaumiza ukitambua siku zako za kucheza zimefika mwisho. Lakini mwisho hutufikia sote na ni bora kujua wakati umefika na kwangu wakati huo ni sasa!”

Gary Neville alisaini kuichezea Man United Julai 1991 na kucheza mechi yake ya kwanza Septemba 1992 kwenye Kombe la UEFA Man United walipocheza na Torpedo Moscow.